उर्दू शिक्षक बदल्याने नवी आबादी शाळेतील टंचाई दूर
समिती अध्यक्ष सिराज रजा यांच्या प्रयत्नांना यश; ज्येष्ठ शिक्षक लियाखत आली सर रुजू
माहूर / प्रतिनिधी
गेल्या दोन वर्षांपासून उर्दू शिक्षकांच्या कमतरतेने त्रस्त असलेल्या जिल्हा परिषद प्राथमिक नवी आबादी शाळेला अखेर उर्दू शिक्षक मिळाले आहेत. समितीचे अध्यक्ष सिराज रजा यांनी गेल्या दोन वर्षांपासून संबंधित अधिकार्‍यांना वारंवार पत्र देऊन शिक्षकांची मागणी केली होती. त्यांच्या सातत्यपूर्ण पाठपुराव्यामुळे अखेर ही मागणी पूर्ण झाली आहे.
केंद्रीय शाळा माहूर येथून विनंती बदलीद्वारे ज्येष्ठ उर्दू शिक्षक लियाखत आली सर यांची बदली नवी आबादी शाळेत झाली आहे. त्यांनी आपल्या तीस वर्षांच्या दीर्घ सेवेत असंख्य विद्यार्थ्यांना घडवले असून, त्यांच्या शिष्यांपैकी अनेकजण आज डॉक्टर, शिक्षक, व प्रशासकीय सेवेत कार्यरत आहेत.रुजू होताना लियाखत सरांनी सांगितले की, “माझ्या उरलेल्या सेवाकाळात मी नवी आबादी शाळेतील विद्यार्थ्यांना घडवण्यासाठी पूर्ण समर्पणाने काम करणार आहे.शाळेत त्यांच्या स्वागताचा कार्यक्रम शाळा व्यवस्थापन समितीच्या वतीने मोठ्या उत्साहात पार पडला. अध्यक्ष सिराज रजा यांनी शाल व फळांची टोपली देऊन त्यांचा सत्कार केला. या वेळी शाळेच्या मुख्याध्यापिका सौ.ललिता जोशी मॅडम, ज्येष्ठ सहाय्यक शिक्षक एस. एस. पाटील सर, उर्दू विभागीय शिक्षक जमीर अहमद सर, सौ.नखाते मॅडम व मुजिब सर उपस्थित होते.कार्यक्रमानंतर विद्यार्थ्यांमध्ये आणि पालकांमध्ये आनंदाचे वातावरण होते. दोन वर्षांपासूनची शिक्षक टंचाई अखेर दूर झाल्याने शाळेच्या उर्दू विभागाला नवी ऊर्जा लाभली आहे.
